गोगटे जोगळेकर महाविद्यालयाच्या (स्वायत्त) गणित विभागातर्फे विद्यार्थ्यांकरीता दि. १० डिसेंबर २०२४ रोजी “पॉवरपॉईंट प्रेझेंटेशन” ह्या विषयावरील स्पर्धेचे आयोजन केले गेले. याप्रसंगी व्यासपीठावर गणित विभाग प्रमुख डॉ. दिवाकर करवंजे, स्पर्धेसाठी लाभलेले परीक्षक प्रा. आदिती जोशी व प्रा. तृप्ती धामणस्कर उपस्थित होते. कार्यक्रमाचे प्रास्ताविक व पाहुण्यांचे स्वागत गणित विभाग प्रमुख डॉ. दिवाकर करवंजे यांनी केले. विद्यार्थ्यांना पॉवरपॉईंटचे स्किल्स, स्टेजवरील वावरासाठी आत्मविश्वास मिळणे, संभाषण कौशल्येयेणे ह्या हेतूने ही स्पर्धा दरवर्षी भरवली जाते.
सदर स्पर्धेसाठी परीक्षक म्हणून लाभलेल्या प्रा. तृप्ती धामणस्कर यांनी सहभागी विद्यार्थ्याना प्रेझेंटेशन तयार करताना कोणत्या गोष्टी अपेक्षित आहेत तसेच सादरीकरणाच्या तयारीबाबत मार्गदर्शन केले. प्रा. आदिती जोशी यांनी त्यांच्यावेळच्या या स्पर्धेच्या आठवणी सांगितल्या व आपण हे करू शकतो हा मोठा आत्मविश्वास ह्या स्पर्धेमधून मिळतो हे आवर्जून सांगितले. सादरीकरण करताना वेग कसा असावा, गणिताच्या बेसिक कन्सेप्ट माहिती असाव्यात असेही मत व्यक्त केले.
ह्या स्पर्धेमध्ये १९ संघ मिळून ३४ विद्यार्थ्यानी भाग घेतला होता. त्यातील कु. शिवम कीर, कु.कावेरी जंगम व कु. मुस्कान चिकटे व कु. निशात पावसकर व कु. सारा मजगावकर यांनी अनुक्रमे प्रथम, द्वितीय, तृतीय व चौथ्या क्रमांकाचे पारितोषिक मिळवले.
आपला विषय चांगल्या पद्धतीने मांडणे , आत्मविश्वासाने समोर येऊन बोलणे याचे शिक्षण महाविद्यालयीन जीवनापासूनच विद्यार्थ्यांना अशा स्पर्धांमुळे मिळणे शक्य आहे असे मत रसायनशास्त्र विभागातील वरिष्ठ प्राध्यापक डॉ. मिलिंद गोरे यांनी समारोपाच्या कार्यक्रमात व्यक्त केले तसेच गणित विभागाद्वारे गेली १५ वर्षे सातत्याने ही स्पर्धा घेण्यात येत असल्याने याबद्दल गणित विभागाचे आणि सर्व सहभागी विद्यार्थ्यांचे कौतुक केले. सहभागी विद्यार्थ्यांच्या उत्स्फूर्त प्रतिसादामुळे ही स्पर्धा उत्तमरीत्या पार पडली.
कार्यक्रमाचे सूत्रसंचालन प्रा. स्पृहा जोशी यांनी केले. सरतेशेवटी स्पर्धा समन्वयक प्रा. स्पृहा जोशी यांनी विज्ञान उपप्राचार्या, परीक्षक, गणित विभागप्रमुख व महाविद्यालयाचे आभार मानले. ही स्पर्धा यशस्वी होण्यासाठी गोगटे जोगळेकर महाविद्यालयाचे (स्वायत्त) प्राचार्य डॉ. मकरंद साखळकर यांचे विशेष मार्गदर्शन लाभले.
