उद्योगक्षेत्रातील आधुनिक उत्पादन तंत्रज्ञान, गुणवत्ता नियंत्रण आणि औद्योगिक सुरक्षिततेची प्रत्यक्ष माहिती विद्यार्थ्यांना मिळावी या उद्देशाने गोगटे-जोगळेकर महाविद्यालय (स्वायत्त), रत्नागिरी येथील विज्ञान शाखेच्या द्वितीय व तृतीय वर्ष बी.एस्सी. रसायनशास्त्र विभागातील विद्यार्थ्यांची फिनोलेक्स इंडस्ट्रीज, रत्नागिरी येथे औद्योगिक भेट आयोजित करण्यात आली.
दि. ११ जुलै २०२६ रोजी झालेल्या या भेटीदरम्यान विद्यार्थ्यांनी पीव्हीसी (PVC) रेझिन व पीव्हीसी पाइप्स निर्मितीची संपूर्ण प्रक्रिया प्रत्यक्ष पाहिली. कंपनीतील तांत्रिक व वैज्ञानिक अधिकाऱ्यांनी उत्पादन प्रक्रियेतील विविध टप्पे, गुणवत्ता नियंत्रण, स्वयंचलित उत्पादन प्रणाली तसेच औद्योगिक सुरक्षिततेच्या उपाययोजनांची सविस्तर माहिती दिली. विद्यार्थ्यांना अत्याधुनिक यंत्रसामग्री, विविध उत्पादन विभाग आणि पूर्णतः स्वयंचलित कंट्रोल पॅनलद्वारे चालणाऱ्या उत्पादन प्रक्रियेचे निरीक्षण करण्याची संधी मिळाली.
या भेटीत महाविद्यालयातील ४७ विद्यार्थी सहभागी झाले होते. त्यांच्यासमवेत रसायनशास्त्र विभागाचे डॉ. स्वामीनाथ भट्टर, डॉ. उमेश संकपाळ आणि डॉ. मेघना म्हादये-घुमे उपस्थित होते. भेटीचे नियोजन विज्ञान शाखेच्या उपप्राचार्या व रसायनशास्त्र विभागप्रमुख डॉ. अपर्णा कुलकर्णी यांच्या मार्गदर्शनाखाली करण्यात आले. फिनोलेक्स इंडस्ट्रीजचे श्री. माधव साळस्कर आणि श्रीमती श्रुती शिंदे (एच.आर.) यांनी भेटीचे समन्वयन करून विद्यार्थ्यांना आवश्यक मार्गदर्शन केले. या उपक्रमासाठी महाविद्यालयाचे प्राचार्य डॉ. मकरंद साखरकर यांचे मोलाचे सहकार्य लाभले.
अभ्यासक्रमाशी निगडित औद्योगिक प्रक्रियेचा प्रत्यक्ष अनुभव देणारी ही भेट विद्यार्थ्यांसाठी अत्यंत ज्ञानवर्धक व उपयुक्त ठरली.
Visitors Online : 0